Saturday, February 19, 2005

باهار

ساقيا دولدور قدح چون يئتدي فصل نوبهار
مرغزار اولدي چمن سويله ر چمنده مرغ زار

گول چمنده پادشاه اولدي بزتدي مجلسي
لاله گلدي قوللوغا توتدي شراب خوشگوار

صبحدم بستانه ساري گل گشت اوچون عزم ائيله ديم
باغچادا گوردوم كي چيخميش بير حبيب گلعذار

ديشي اينجو، گوزي جادو، خالي هندو، بئلي مو
ساچي سنبل، خالي فلفل، اوزي چون گل، آغزي دار

خوب منظر، گوزي كافر، كيپريگي خنجر، قاشي ياي
قد صنوبر، بويي عرعر، لاله ي تر، شول نگار

يوزي نون و گوزي عين و اوزي ري قامت الف
ساچي جيم و خالي ميم و يوزي نقطه خط غبار

دلبريم بير قيل بهاسي قيمتي دورد اقليمه
بيري مصره، بيري چين و بيري هند و بيري لار

معرفتدن كوثر اولدي هم ((نسيمي)) چاكري
نسبتي يوخدور اونونلا عين دين و اختيار

نسيمي


باهار

بهار اولدي گل اي دلبر تماشا قيل بو گلزاره
بوراخدي غنچه لر پرده، بشارت بولبول زاره

شقايق پرده دن چيخدي بوياندي باغ ايله بستان
ايرشدي گلشني حسنون بوياندي رنگ ازهاره

مني منع ائتمه اي زاهد، گوونمه ذكره اي صوفي
كي سن مغرورسان ذكره منم مشتاق ديداره

كي هر بلهم اضل بيلمز ندور كي عشقين احوالي
ايرشمز قاصرين عقلي بو مغلق سر اسراره

عبير و مشك وعنبر تك رياحين دن چمن دولدو
سحرده طعن ائده ر ساچون نسين مشك تاتاره

كي چيخدي غنچه دن سنبل گريبان چاك ائده ر من تك
دليندي غصه دن باغريم، سن ائتمه اوره گيم پاره

چمنلر مختلف اولدي هزار الوان چيچك لردن
آچيلدي نرگس و لاله و نسرين، شكوفه گلدي اشجاره

آچيلدي نرگس ولاله توتوبدور ياسمن چادر
سؤيودلر ارغوان تيتره ر، قميشلر يئتدي انهاره

بنفشه گول تماشاسي غنيمت بيل كي بئش گوندور
ساتار معشوقه گول حسنون خريدار اول بو بازاره

ييغيلدي جانينا جاني، دمي عيسي نسيمي نين
وصال دردينه درمان ايرشدي جان بيماره

نسيمي

0 Comments:

Post a Comment

<< Home